吉壽日本料理 (Closed)

一大班人聚會或者慶祝生日去食放題就最好，今日我地一大班人去左一向有保證嘅旺角吉壽食晚餐，七點去到已經人山人海，好彩我地有訂枱先唔駛排隊，直接可以入座。 途經自助區已經見到很多飲品，最令我驚訝嘅係居然有暖櫃，有暖維他奶暖茶等十分體貼。另外自助區仲有枝豆、小丸子、葡撻、雪糕雪條等等。一坐底大家就瘋狂叫野食，先來一大盤海鮮刺身，三文魚厚切，帶子、刺身、甜蝦等都十分新鮮，吉壽果然有保證！熱食都種類繁多，呢度竟然有鮑汁燴花膠，花膠夠晒入味，而且亦都很冧滑。放題當然唔少得我至愛嘅羊架，燒得香口，肉質唔會乾夠juicy，我連食兩件十分滋味!燒鰻魚上菜個陣仲熱辣辣，燒汁十分惹味，每件切成一口size，令人一件又一件咁食到停唔到口。蟹黃瑤柱海鮮粥材料十足，粥底滲透滿滿嘅海鮮鮮甜味，而且食落軟綿綿。另外，我地仲點左芝麻雞翼、紫心香芋丸、一口芝士等等嘅小吃，特別鍾意一口芝士，食落真係拉出條條芝士絲，其他朋友則鍾意香芋丸，讚佢芋頭味夠晒香濃。最後我地仲攞左成枱甜品，有葡撻、乳酪、沙冰等等大滿足!總括而言，呢度勝在食物種類多，上菜又快，果然係日式放題老字號。