Mad for Garlic (Closed)

作為一個新界人，要同啲九龍人一齊食嘢， 梗係要搵啲我哋都方便地方。而呢個地方就非九龍塘莫屬。但朋友話九龍塘都好似冇乜嘢食喎!其實都唔係,又一城開咗好多新色嘅餐廳,而今次我哋就嚟呢度去試試新派嘅韓國菜。環境就有一部分係open area，佈置都有好有節日嘅氣氛，位置都見寬敞舒適。呢度所有野都好想食呀~因為全部都好新式。先點咗一個出名嘅 pizza。英文叫做garlic snowing pizza。呢個pizza入面有蝦， 菠蘿同埋炸蒜片。呢個pizza食落去甜甜地，加上菠蘿油好開胃，上面嬸咗好多芝士粉，食落去好有芝士香，又唔係覺得油膩。而pizza餅好薄， 啱曬女仔因為唔使食咁多麵粉嘛。另外叫左個蒜香忌廉汁蟹肉及龍蝦肉意粉，龍蝦肉同埋蟹肉都好足料。龍蝦好爽口彈牙，忌廉汁甜甜地，加埋啲蒜香，配搭唔錯幾新穎。而且忌廉汁好濃郁，食到咀lam lam。最後一道菜係烤澳洲牛柳配牛油餡角配蒜香忌廉汁及墨西哥辣椒醬。先講一講個醬， 墨西哥辣椒醬就冇乜辣味但係好有椒香。而忌廉汁好似中東酸奶醬好醒。 個牛柳烤得啱啱好，肉質軟淋，嫩滑，放埋入牛油餡角裡面食，成個口感好獨特。如果有埋蔬菜一齊食就更加fit啦。