嵐橋丼飯專門店 (Closed)

當有一間餐廳，佢可以好自豪咁話俾你知佢哋係專門做丼飯🍚嘅時候，我就旨意對佢哋有好大期望。餐廳其實都好近尖東站，尖東站P出口過一條馬路，再行多少少就到，一啲都唔遠。餐廳門面唔算好大，但店員服務就非常用心。餐廳係丼飯專門店，有非常多款可以揀。我叫左個海之幸丼，$258，裏面有中拖羅、赤身、深海池魚、三文魚子、蟹肉、赤蝦，加埋落咗秘製醬汁嘅飯，微酸。😉結果就係....好食😋：三文魚籽唔會有腥味，而且脆卜卜，圓錄錄，晶瑩剔透。拖羅無渣，入口雖然唔係即溶，但係啲魚油已經非常香，加埋一個酸酸地嘅丼飯，完全中和油膩感之餘亦提升左刺身嘅鮮味。👍麵豉湯亦都好好飲，佢呢度仲可以加$28 ，升級做一個𩶘魚湯👍最後梗係唔少得叫多幾件壽司食啦。特別鍾意佢個蟹肉蟹膏豆腐壽司，蟹肉係非常清新，加埋蟹膏，配埋粒粒彈牙嘅飯，一齊放入口，係好好食。小肌魚壽司，聽個名以為有好多肌肉，實質係一塊軟身而且非常鮮嘅魚生，有清清的肉香，非常好。