鮪世市場 (Closed)

鮪世市場已經食咗好多次，冇諗過係類似美食街入邊嘅小店會有omakase級嘅水準，價格仲要好親民，自己嚟食狂嗌都唔心痛。三文魚、油甘魚同帆立貝都有成1cm咁厚，最鐘意帆立貝甜到爆，赤海蝦都好新鮮彈牙。 驚覺成碟夾埋都係$126，出面賣2、300都唔出奇，性價比爆曬錶。本鮪壽司盛有赤身、中拖羅、大拖羅同拖羅蓉軍艦，一次過試晒唔同部位。 其實平時我只會食大拖羅同拖羅蓉，太瘦我麻麻哋，但呢個壽司盛好啱我口味，用料好靚，中拖羅油脂都好豐富。 留返最肥嗰舊最後食，魚油爆曬出嚟，好滿足。芥辣八爪魚軍艦好有驚喜，食得出自家製嘅味道。 八爪魚直頭脆到卜卜聲咁，芥辣唔會太攻鼻，食完好想encore。 海膽軍艦正常發揮，食得出加拿大海膽嘅濃度，好鮮甜。火炙左口魚裙邊同火炙三文魚腩壽司呢個爆油組合都係我嘅至愛，同預期一樣咁甘香肥美，左口魚裙邊都有啲厚度，成口魚油好幸福。