Amitie Kitchen

Open Now

Now Closed

終於有天平日假，第一時間做自己喜歡嘅事情，就係整麵包同去食好野，原來喜歡的事都同食有關，哈！雖然中午來到，但餐廳已有聖誕嘅佈置，好有氣氛。長方形格局，有多張二或四人枱，坐得幾舒服。有午巿套餐和a la carte，午巿套餐包餐湯或沙律、主菜、甜品和咖啡/茶，可加錢轉其他甜品和飲品。是日餐湯係南瓜薑忌廉湯，口感好棉滑，少少南瓜香，薑味較重，有啲辛辣感。午餐menu有十三款選擇，揀咗香煎阿拉斯加比目魚柳6安士配薯菜（$158）。賣相幾得，魚柳白雪雪，肉嫩皮脆；薯菜好豐富，有燒過的茄子、翠肉瓜、紅黃椒，全部都保持得好爽嫩，最鍾意係用了手指蕃薯，粉綿甜美，健康有益，好食！炒煙肉椰菜仔（$48）翠綠清爽，加了腍嫩嘅煙肉同炒，味鹹香，不錯嘅配搭！伯爵茶慕絲蛋糕（$30/跟餐轉）是黑板上的推介，其實仲有多款芝士蛋糕揀添！賣相好驚喜，用心!口感都好幼滑，啖啖伯爵味嘅幽香，味道和口感我都喜歡！宇治抹茶牛奶咖啡（+$15/跟餐轉）入口暖笠笠，味道香滑，啖啖抹茶的甘苦，抹茶控必定鍾意。