半份香蒜蜜糖炸雞
炸雞即叫即炸，上枱熱辣辣！外皮脆到「咔哧」聲，粉漿薄身掛滿香蒜蜜糖醬，蒜香夠晒霸道，蜜糖甜度啱啱好唔會膩。雞肉去晒骨啖啖肉，咬落嫩滑爆汁，完全唔乾柴。配菜有齊波浪薯條、薯角同薯格，全部炸得金黃脆口，邪惡度爆燈！加$28追加嘅Cheese Stick🧀 係驚喜之作，外層炸衣超脆，一拉開澎湃芝士瀑布湧出。
豬腳
呢碟絕對係重量級！豬腳切到薄片鋪滿成盤，皮燜到超軟糯，肉鬆化入味，醬油鹹香中帶蒜蓉。跟生菜、蒜片同韓式辣醬包住食清爽解膩。必點
1
芒果馬格利酒
用傳統大碗上枱，儀式感十足！芒果果蓉配米酒，甜度天然唔假，飲落似芒果乳酪咁清爽。酒精濃度低易入口，配炸雞一流。
餐廳佈置超有韓劇feel！滿天星星燈✨、情侶鎖牆🔒平日都勁多人，建議提前訂位。兩個人食晒三樣加飲品埋單約$600，其實份量夠3個人食，係我地貪心嘅，炸雞同豬腳水準超高，環境打卡able，係旺角區高質韓餐之選！
