Video
Read full review
2020-04-28
3106 views
嘻嘻好耐無用過訂台App，最近見有$25優惠碼，就即刻唔蝕底，搵間餐廳食下。有間位於堅尼地城嘅熱狗店原來都有喺依個平台登陸，反正一早就已經想試，而家簡直係正中下懷😝。仲要指定時間(15:00/17:00)購買，有成50% Off，半價就食到，抵到爛！熱狗店係就係離開地鐵站唔遠，但個位置就相當偏僻，住宅屋苑樓下，普通行街絕對唔會經過。不過咁樣都無阻佢嘅人氣，親身嚟買嘅客人定係外賣步兵都有唔少👏。外賣店細細，但門口都設有一塊連儂牆💛。女店員幾好禮貌，而且非常醒目，對訂台App嘅運作及優惠非常清晰👍。熱狗店顧名思義係賣熱狗，大約有8款揀；另外仲有薯條同洋蔥圈等小食賣。如果用訂台App買，就無得要套餐，但計落都仲係化算啲😊。不過小店還是小店，廚房細，出餐速度始終都較慢，落單後我哋足足等了20分鐘🙈。如果唔係疫情關係，我哋可能會喺公園即食，而家就拿拿聲搭兩個站地鐵返屋企開餐，都係15分鐘。但唔知係咪都叫做放咗一陣，食物唔算仲係好熱辣辣。火炙芝士辣肉醬熱狗Chili Dog with Cheese🌭($42)，材料包括芝士、辣肉醬、生洋蔥、黃芥茉同荷蘭腸。Wow呢隻潛艇真係好好食😋，每一樣配料都好
嘻嘻好耐無用過訂台App，最近見有$25優惠碼，就即刻唔蝕底，搵間餐廳食下。有間位於堅尼地城嘅熱狗店原來都有喺依個平台登陸，反正一早就已經想試，而家簡直係正中下懷😝。仲要指定時間(15:00/17:00)購買，有成50% Off，半價就食到，抵到爛！
熱狗店係就係離開地鐵站唔遠，但個位置就相當偏僻，住宅屋苑樓下，普通行街絕對唔會經過。不過咁樣都無阻佢嘅人氣，親身嚟買嘅客人定係外賣步兵都有唔少👏。
外賣店細細，但門口都設有一塊連儂牆💛。女店員幾好禮貌，而且非常醒目，對訂台App嘅運作及優惠非常清晰👍。熱狗店顧名思義係賣熱狗，大約有8款揀；另外仲有薯條同洋蔥圈等小食賣。如果用訂台App買，就無得要套餐，但計落都仲係化算啲😊。
不過小店還是小店，廚房細，出餐速度始終都較慢，落單後我哋足足等了20分鐘🙈。如果唔係疫情關係，我哋可能會喺公園即食，而家就拿拿聲搭兩個站地鐵返屋企開餐，都係15分鐘。但唔知係咪都叫做放咗一陣，食物唔算仲係好熱辣辣。
火炙芝士辣肉醬熱狗Chili Dog with Cheese🌭($42)，材料包括芝士、辣肉醬、生洋蔥、黃芥茉同荷蘭腸。Wow呢隻潛艇真係好好食😋，每一樣配料都好正，整體好夾。再者，食熱狗嘅關鍵就係一定要有芥茉，而呢到嘅Mustard好食就已經無得輸！
火炙芝士辣肉醬熱狗
$42
64 views
0 likes
0 comments
炙燒過嘅芝士超香，辣肉醬略嫌唔夠辣(同唔夠多)，話哂佢餐牌都有成兩隻辣椒🌶️🌶，哈哈。生洋蔥食完一浸味，但食嘅時候就覺得好香口。最後，要讚嘅就係條荷蘭大肉腸，好粗好長，啖啖肉，仲有脆皮，好滋味🤤。
澳式風情熱狗
$38
50 views
1 likes
0 comments
澳式風情熱狗Aussie Dog🇦🇺($38)，材料包括芝士、煙肉、菠蘿、千島醬同紐倫堡腸。哇呢個完全無Wow嘅感覺...，可以話同上面嗰個差天共地。配料組合幾夏威夷風情，因為有菠蘿同千島醬。但失色在於呢個包係唔落芥辣㗎，自己無睇清楚，無得怪人。除此之外，我唔鍾意個包係配紐倫堡腸😵，個人不嬲都認為呢隻腸非常唔好食。但依個唔係餐廳問題嚟嘅...😅。
芝士煙肉薯條
$26
67 views
0 likes
0 comments
芝士煙肉薯條🍟($26)，芝士量有瀑布咁多🧀，正，但煙肉粒就比較少。薯條夠哂粗，而且一啲炸嘅感覺都無😂，唔知係咪微波過嘅影響。但反而咁，我覺得薯條更加好食，更似薯仔，啱哂我呢個薯仔控🥔。我食完先明白頭先買嘢食有個男仔話走茄汁，因為係直接落埋落去，未必個個鍾意。
飛船小食杯
$26
36 views
0 likes
0 comments
飛船小食杯👽($26)，呢個包括洋蔥圈、雞塊同薯格，嗌一份就食得到三款小食，稱得上係一次過滿足三個願望。不過三款都真心唔好食...，我唔知係我放耐咗嘅問題定點，定係太多茄汁，全部都勁淋😑。雞塊好粉、薯格完全唔脆，邊好食㗎？兩樣都不及連鎖店出品...。
牛油粟米杯
$10
25 views
0 likes
0 comments
牛油粟米杯🌽($10)，粟米係幾大杯，但味道一般般，我唔覺有牛油味，加上粟米粒本身唔夠甜、又唔夠多汁，似呀媽煲完老火湯嗰啲...。
烤菠蘿
$8
25 views
0 likes
0 comments
烤菠蘿🍍($8)，本身想要冰菠蘿，但覺得烤菠蘿好似無咁頹，就轉咗，女店員好好話無問題。烤菠蘿原來只係得四粒，微微烤過，但咁平，就由佢啦。反正菠蘿本身好食。
總括嚟講，呢餐有好有唔好，味道仲幾極端。不過招牌菜：火炙芝士辣肉醬熱狗🌭️真係好好食，絕對值得推介；另外薯條亦都可以一戰，建議配辣肉醬。我哋估唔到食完呢餐遲來嘅午餐，會咁飽，夜晚都唔使點食。如果以折扣價計算，真係十分非常之抵食，正價就要考慮下😎。熱狗店有其他分店，有機會嘅話都不妨試下，支持呢間黃色潛艇店💪。(評分是以優惠價格作量點。)
Post
