蜀府川鍋 (Closed)

天氣突然又凍返咁多，又係時候去打邊爐喇。聽朋友介紹油塘呢間隱世火鍋店材料新鮮又抵食，所以今次都決定放工嚟試吓。一入門口就見到好多海鮮，決定今次嚟過海鮮粥底火鍋。其實呢度除咗粥底火鍋之外都有好多唔同湯底嘅火鍋選擇，但我哋今次就要左原隻龍蝦大蜆粥。係火鍋上菜前我哋要咗兩個小食，呢碟尖椒皮蛋真係好有驚喜，蛋黃味好濃，蛋白部份有好彈牙，加埋辣既尖椒好開胃。另外一個小食係蒜泥白肉，肉嘅肥瘦比例啱啱好，唔會鞋口，而且蒜蓉好香。到主角出場啦，個火鍋都幾足料有一隻大龍蝦同十幾隻蜆。海鮮方面有兩隻北海道大元貝，新鮮大連九頭鮑魚，沙巴龍躉原條起片，花膠，全部海鮮都好新鮮呀！仲有最驚喜嘅美國桶蠔，一碟有八隻，每隻都好大好肥美，就算淥左好耐仍然都保持到個size。叫咗咁多海鮮為嘅都係最後呢碗粥，果然不出所料呀，超級超級鮮甜！而且仲好綿，冬天食到一碗暖笠笠嘅粥真係好幸福！叫咗咁多咁新鮮既海鮮都唔使$1000，仲食到好飽，真係好抵食！