洋食商店 (喜遇)

Open Now

Now Closed

搬來呢區兩個月，開始要發掘多啲附近嘅食店，今日就揀咗呢間好多好評嘅洋食商店。果然係洋食商店，既係食店又係商店。店內周圍都係打卡位。坐低之後店員就奉來餐前小食，係我最鍾意食嘅枝豆。第一次嚟咩都想試，所以就揀咗串燒拼盤，入面包括有燒蝦、五花腩、秋葵、雞翼、冬菇同菠蘿，個人認為五花腩同燒菠蘿甚有驚喜。另外仲叫咗一份明太子玉子燒，呢個價錢連埋有表演睇，真係絕對不能錯過。玉子燒上佈滿明太子沙律醬，以火槍即時燒至焦香。最後放上山咁高嘅蟹籽，真係物超所值。日式燉牛肋肉個汁都幾好味，不過以份量而言，性價比相對較低。上網見好多人大讚呢個真·甲羅燒手工Pizza，我當然都要試吓，果然充滿氣勢。整個Pizza佈滿咗蟹膏，蟹蓋上仲有蟹肉同海量嘅蟹籽，仲有隻蟹鉗俾我哋慢慢品嚐，果然係必食精選。另外我哋仲點咗兩杯特飲，分別係黃色嘅爆打雙檸綠同綠色嘅話梅薄荷青檸梳打，兩杯都咁清新怡人。