新匯聚餐廳小廚

Open Now

Now Closed

今晚帶媽咪黎呢度晚飯，呢度有潮州打冷又有鑊氣小炒同大排檔風味，選擇好多，對有選擇困難症嘅我地真係花多眼亂，經店員向我地介紹一下，終於決定到食乜。炸乳鴿新鮮即炸，熱辣辣，色澤油潤，皮脆，肉質不會嚡，唔會乾巴巴。蜜糖薯仔牛柳粒好有鑊氣，好惹味，薯仔炒得好香口，外脆內軟，蜜糖加上黑椒，令人忍不住一口接一口。牛柳粒啖啖肉，如果牛柳再多啲就好啦。韭菜豬紅好耐冇食啦，今日見到菜牌有即刻點來試。賣相好吸引，澎湃的翠綠韭菜鋪在份量超多的豬紅。豬紅滑滑的，微微的Q彈，口感不錯，一點腥味也沒有，汁料調味剛好，不會太過咸，韭菜亦尚算嫩。潮式蠔仔泡飯我地兩個人叫咗一個細size，但每人都分到兩碗，蠔仔湯好鮮甜，全部蠔嘅鮮甜精華都喺晒啲湯飯度，蠔仔份量好多，目測有十幾廿隻，隻隻都大大粒好飽滿肥嘟嘟，口感好滑，味道鮮甜，完全冇沙，好正。依間餐廳嘅嘢食份量都好大，味道唔錯，適合幾個朋友或一家人一齊嚟，可以試多幾樣野。