2
餐牌上以魚蛋、魚片、墨魚丸同魚餃為主，有得雙併，可以揀湯麵、撈都或淨食。
我咃兩個人點咗兩碗魚蛋墨魚丸河粉，河粉非常滑溜，雖然比較幼身但唔易斷。湯底比較清淡無味精，落少少自製辣椒油就更惹味
每碗有魚蛋墨魚丸各兩粒，由於係手唧而成所以細細粒。魚蛋食落有魚嘅鮮味，調味適中唔會一陣胡椒粉味，而且一啲都唔腥。墨魚丸都好有墨魚鮮味，中間有少少唐芹粒，令口感更為豐富。夏銘記嘅魚蛋堅持唔落任何添加劑，所以口感唔係超彈牙爽口，而係綿密帶少少彈性
兩個人食兩碗魚蛋粉一定唔夠喉，所以仲叫咗一條夏銘記獨有嘅鮮炸魚片。鮮炸魚片價錢係以重度計，呢條就$53，價錢都算合理。新鮮炸起嘅魚片呈金黃色，比起平時嘅炸魚片淺色少少。食落表面有油香味，魚肉鬆化唔會死實實而且有鮮味
埋單時聽到隔離枱要兩包炸魚皮拎走，我都唔執輸買一包。老闆話係呢兩日新炸起，介突登包多一個膠袋以免漏氣，好貼心。第二日開嚟食仍然好脆，粉漿好薄而且無多餘調味，食到魚皮嘅原來嘅鮮味
整體嚟講手打魚蛋同墨魚丸都好味，而鮮炸魚片更加係必食！下次嚟要試埋魚餃同埋買自製辣椒油
