講返我地食嘅嘢：
1. 白灼蝦 > 非常老，一上檯一望就知係over-cooked，都唔明點解咁簡單嘅嘢都可以搞成咁嘅，蝦殼表面已經白哂，離哂殼，肉裡面啲水已經走哂出嚟，搞到啲肉又老又乾。辣椒豉油應該一係就啲辣椒唔靚、又或者係佢地冇將佢煮過，一啲辣味都冇，失敗....
2. 楊州炒飯 > 本來係落單時講明係最後至上，但係竟然係第二樣上枱，唯有又係同經理講，伙記唯有死死地氣拎返入廚房，最後再一次上枱，但係妹妹話好明顯係再炒過，因為飯粒表面啲油多咗。
3. 蒜蓉粉絲蒸元貝 > 雖然你見到佢表面係舖滿蒜蓉同蔥，但係其實一啲都唔香，粒元貝明顯過熟，好韌...
4. 椒鹽瀨尿蝦 > 算做好啲嘅一道菜，夠香口，夠乾身，唔會油淋淋
5. 清蒸老虎班 > 又係過咗火，豉油唔香，帶唔出魚嘅鮮味，都唔明點解個師傳日日都不知要蒸幾多條魚，但係竟然都會失手嘅，真係失敗中之失敗
6. 清蒸重皮蟹 > 一係就佢啲蟹唔靚，一係就唔係當造期、已近尾聲，雖然仍然見到層皮，但係明顯隻蟹應該係keep緊fit，如果唔係根本就冇理由得咁少膏，而且都係一樣-- over-cooked。
7. 蒜蓉炒菜心 > 啲菜好嫩，但係冇咩鑊氣
總評：服務態度強差人意，可以話係不升反降，仲差過以前。平均消費$220/人。食物就大部份都煮過籠，徒哂啲食物，其實海鮮本身冇咩調味料需要，烹調技巧亦冇乜，但係個廚子都竟然可以煮成咁....真係失敗中之失敗，以後去到西貢盡可能都唔好幫襯呢間，唔怪得呢間一向都係少啲人幫襯嗰一間啦.....
