1
港畔餐廳聽講係有拖羅、花膠、海參嘅高質自助餐，結果就中晒伏！首先講吓拖羅，第1轉攞嘅拖羅非常瘦，第2-3轉先至似樣返少少，但魚味仍然偏淡。三文魚刺身無三文魚味，惠康百佳買到嘅都好食過佢。凍海鮮種類少，三點蟹麵包蟹通通都無。鱈蟹腳好多都冇蟹味，感覺上有新鮮&唔新鮮，兩批溝埋一齊。
花膠炆嘅時間唔夠耐，所以唔夠淋。鵝掌就夠淋啦，但係完全冇鵝味，你話係雞腳/鴨腳，我可能都會相信😨慢煮阿根廷西冷多筋位，而且無牛味。食物款式已經唔多，竟然仲有非常相似烹調方法嘅韓式年糕伴海參和韓式珍寶蚌？畀我嘅感覺就係，廚師無擺心機落去思考點樣去煮一道菜！😡
1
最誇張係點餐飲時，我屋企人想點凍檸蜜，某位男職員話蜜糖攪唔溶，叫我們點熱檸水再畀蜜糖我們。不過因為天氣熱，所以我屋企人想點凍檸水，問男職員可唔可以要杯熱水攪溶蜜糖? 點知男職員話要杯熱水會計一杯餐飲！唔講仲以為去錯咗麗晶賓館🤣
食物質素強差人意，唔通我畀差唔多$1000一位，真係淨係過嚟睇維港夜景！？
好食😋：凍蝦(無拍低，新鮮有膏)/韓式珍寶蚌/清蒸海斑/巴斯克芝士蛋糕/萄撻
唔錯Ok嘅：龍蝦/鴨肝水果莎莎/忌簾野箘湯/自家製雪糕
難食😫：加菲蟹/三文魚刺身/慢煮阿根廷西冷/泰式羊架/片皮鴨/鵝掌/鮑魚/印度鷄肉炒飯/黃瓜排骨湯
其它無特別提嘅食物應該係普普通通，或者無食到
