餐廳裝潢走懷舊x新派路線，用上經典綠白色地磚，以及六十年代佈置、裝飾，懷舊設計重現香港集體回憶。
懷舊沙律餐 $68
依個係用生雞髀炸成，雖然唔係超巨型，但咬開雞髀皮脆多汁，雞髀肉嫩，配合香甜嘅什果薯仔沙律，口感清爽。
餐飲加 $9 揀抹茶紅豆冰，一杯3種顏色，抹茶配紅豆永遠都係咁夾。帶少少苦嘅抹茶，以及軟綿嘅紅豆，苦中帶甜，當飲品也可以作甜品享受。
懷舊薯條餐 $61
經典懷舊小食嘅蝦多士，已經較為罕有啦！蝦多士同炸薯條都酥脆可口，呢款真係大人細路都鍾意食。另一個餐飮 +$9 轉樽仔奶茶，茶味淳厚，飲起嚟有層次感，仲方便外帶。
蔥油撈丁餐 $69
到茶餐廳最常見就係即食麵，今次點咗撈丁，麵身都幾爽，唔會煮到淋，而且用咗爆香過嘅蔥油嚟撈丁，味道更佳，更惹味！再配搭厚厚嘅豬扒，豬扒醃得好香，肉嫩唔乾身，好惹味。配以檸檬茶王，茶底比想像中仲要清徹，加埋檸檬味道更清香，口感好fresh。
煎釀三寶 $28
煎釀三寶係香港嘅地道小食，係青椒、豆卜、苦瓜嘅材料上釀入鯪魚肉，炸得香口，淋上甜豉油食更滋味。
