光榮冰室 (厚福街) (Closed)

我表妹同朋友落嚟香港購物，唔知點解指名要來厚福街嘅某間藥房，又係網紅之類，好誇張有條人龍喺度排隊等入藥房買嘢！買咗幾個大袋，企到腳軟。啱啱好對面有間新開嘅冰室，價錢平靚正！同表妹佢哋食個T先繼續行，但佢哋習慣要食飯嘅，所以叫咗個XO醬叉燒炒蛋飯 $48 飽肚啲。絕對係有香港特色，而且炒蛋香滑，配埋個懷舊豉油醬汁，身為遊客嘅佢表示好特別！跟住就係香港茶記食嘅沙嗲牛通、炸雞翼全隻、絲襪奶茶。味道夠晒惹味，成個餐下午茶都係$30，好抵食！而我就最喜歡經典嘅炸吉列豬扒、薯條、沙律下午茶 $40。豬扒真係即叫即炸，熱辣辣鬆脆可口仲要夠肉汁，炸粗薯條更加係正！沙律唔係薯仔係生果已經見到有質素。套餐加$8 就有特飲，我就揀咗銀蓋鮮奶。嘩！真係好耐都冇飲過玻璃樽的十字鮮奶啦！好懷念做學生嘅日子。