中央飯店

Open Now

Now Closed

一入門口就知道呢間係經營超多年嘅老店，裝修夥計味道都好懷舊，正合心意。五個人四餸一湯，包括鹽焗雞半隻、炸大腸拼腰肝卷、枝竹炆斑頭腩、梅菜扣肉及胡椒豬肚湯，另外叫咗一碗白飯兩罐汽水先至係$678，真係價廉物美。鹽焗雞半隻都算大份，雞肉夠香夠嫩。梅菜扣肉我話就話邪惡，不過呢間舖頭嘅扣肉偏瘦，雖然都係脂肪同瘦肉一層一層咁隔開，不過脂肪比例明顯低，食得健康啲都係好嘅。腰肝卷係幾樣之中最好食，豬腰豬肝同蔬菜切絲然後包住炸，味道同口感都唔錯，點少少醋就冇咁油膩。炸大腸都唔錯，揸得夠乾身，可以做雙拼都真係好開心，因為可以食多啲款式。枝竹斑頭腩個份量都幾大，斑頭腩肉都算多，記得喺出面其他地方食過，都差唔多嘅價錢但係份量就少好多。啲支竹吸咗斑頭腩嘅魚汁特別好味。個胡椒豬肚湯又係一絕，胡椒味剛剛好唔會太搶喉，豬肚洗得乾淨冇豬羶味，個湯煲得好靚，係超值選擇。呢碗綠豆沙雖然係送嘅，不過一D都唔失禮。