海安咖啡室 (Closed)

海安俾我嘅回憶係乜?細細個阿媽喺隔離舖頭返工,放假佢帶埋我返工時,有時會嚟呢度食下早餐,所以就算已經過咗廿幾年,都仍然記得呢一度~前幾年仲係喺外國讀書放假返港時,曾經帶同女友到海安一遊,而女友對呢度印象最深刻,就係呢度嘅公治係有叉燒,而且仲要抵食~但自從畢業返港投身社會後,由於唔喺中上環返工,放工後呢度又已經閂門,故一路都無再嚟過...直至是日放假,諗住搭船過尖咀,喺電車途中見到海安,就心血來潮落車去幫襯下~時值3點鐘,一入到去,無人,只有幾個阿姐清潔梗...幾位阿姐都好熱情招呼,無話俾面色我睇阻住佢地收工,以茶記嚟講,呢度班阿姐嘅服務可以算得上非常非常之好~見到檯上餐牌,有好多創新思維嘅菜式,好似煙鴨胸撈公仔麵,不同款式紅豆冰等,證明就算幾懷舊都要與時並進~最後要咗個常餐,有菠蘿油 + 餐肉公仔麵 + 凍齋啡=$30,菠蘿油賣相唔錯,都幾大,但衰在唔熱,如果夠熱一定好好食,因為佢個皮好脆;餐肉麵兩塊餐肉都煎得好香,麵又夠彈牙,如果有埋蛋會更好~凍齋啡都唔錯,啡唔溼,幾有咖啡香~阿姐好好招呼,特登問問需唔需要辣椒油,仲整碟辣椒油俾我,食麵加埋辣椒油先一絕~$30,以一個常餐嚟講,真係貴