金記冰室 (Closed)

星期六下午，啱啱喺楊屋道街市買完餸， 就嚟到呢一間金記冰室食個下午茶 。呢間冰室雖然喺街市附近， 但係餐廳嘅格局好用心、 好有懷舊嘅味道。沿著樓梯， 會見到一啲好特色嘅懷舊擺設， 所以呢間冰室，絕非一般嘅茶餐廳 。上到一樓， 見到餐廳都幾大， 仲保留咗茶餐廳嘅卡位。 星期六下午茶時段，入面幾乎坐滿人。 我哋兩個人分別點左招牌嘅焗豬扒飯 和 乾炒牛河。 焗豬扒飯塊豬扒 都好大 ，豬扒軟淋淋， 啲飯係炒飯底，而我最欣賞係佢唔會太濃味，食完唔會好口渴，都唔錯 ﹗而乾炒牛河就真係值得一讚 好夠鑊氣﹗ 食咗十分鐘 ，仍然係好熱 。同樣我都好欣賞佢唔會偏鹹， 但又夠味。 最後，我同朋友每人叫咗一個 酥皮蛋撻，蛋撻暖笠笠，外貌好靚，食落都好新鮮， 好似啱啱出爐咁，好重牛油味， 脆脆的，好味 。兩個下午茶餐仲跟一杯飲品， 每人啱啱好50蚊，都算抵食﹗