高興 (Closed)

睇咗「跟黃秋生飲食」嗰條片，見佢一開波就彈人嗰碟卡邦尼意粉，但係大讚個炸魚薯條，童話個蒜香豆豉鯪魚意粉巴閉，就覺得條片應該係真心介紹，就即刻搵個friend陪我去試嗰碟意粉。開門之前，以為佢只係其貌不揚嘅普通工廠大廈食肆，點知一推開門，見到啲燈光，又有一排剪髮舖咁嘅位，仲有啲皮嘅卡位，用心嘅設計，即時加咗唔少印象分。一坐低，二話不說即刻叫咗個蒜香豆豉鯪魚意粉先，又真係大件夾抵食喎，個意粉少少辣，偏鹹嘅感覺，再加埋蒜，真係啱晒我口味，個豆豉鯪魚同個意粉夾得埋，果下犀利。另外仲叫咗個玫瑰Latte，正常嘢，不過不失，不過造型美觀，有幾塊玫瑰花瓣咁，配合成間餐廳嘅裝修，每個角落都可以係影相位，啱晒港女黎打卡。之後再加多咗個朱古力pancake，都係普通野，正正常常咁，兩個人食完飽到毆。