不過，皇天不負有心人，望去對面，發現對面就係我地嘅目標——CoHee
佢有兩個打對面嘅舖位，一邊係點餐同廚房，另一邊就係咖啡Bar。
我地點完餐，就過左咖啡bar 個邊坐。
紐約芝士蛋糕，不過不失嘅表現，欣賞佢地願意花心機做擺盤裝飾，蛋糕唔會話好甜，但略嫌餅底有少許唔夠實。朋友試左焙茶味，我覺得比紐約芝士餅好味。
飲左兩杯，第一杯係雲南普洱風味嘅咖啡，第二杯係印尼曼特寧（以上係曼特寧，第一杯唔記得左影），曼特寧呢隻咖啡其實好考烘焙師手勢，拿捏得唔好就會變得好苦好澀，幸好呢到嘅曼特寧烘焙得好好，因為佢完全發揮到曼特寧獨有嘅醇厚同甘香。
講真，其實感覺似係去左一個朋友屋企多過去左一間咖啡店，因為我地去個時嘅咖啡師，雖然唔係屬於多野講，但係當同你交流嘅時候你感受到係真摰嘅，同埋最主要嘅係當你係個個環境入邊嘅時候，你會感受到成個人都好放鬆。
