先講下環境，環境舒服，枱夠大，食物分開咗两邊，右面係熟食，左面係甜品，咖啡，冷盤同魚生。另外有一個Kid corner 比小朋友食完嘢玩，需然入面唔係好多嘢玩，但依個idea我覺得幾好。
魚生唔多款選擇，得三文魚，北寄貝同鯛魚。因為依三款我都唔食的，所以比唔到意見，但媽媽話三文魚都好新鮮，其他佢冇食。
冷盤大蝦好爽好味，蜆就冇乜味，藍青口因為大部份都冇開口所以冇攞，至於翡翠螺都好爽，但有少少沙，所以一隻起两隻止了。
熟食方便比起其他酒店唔算太多選擇，但味道係唔錯嘅，天婦羅啲粉厚咗啲，可能我攞時唔係炸起即攞，所以有少少淋咗。咖喱好味，好香，味道幾好，如果再辣啲仲正
。燒三文魚，牛仔骨，椒鹽魷魚圈都好好味，燒味方面都燒得好好食，整體上熟食雖然唔多但味道都幾好。
甜品方便係我最緊要嘅
之所以揀依間餐廳係因為見到佢個雪糕櫃，所以先講下啲雪糕，雪糕超級好味，我最鍾意椰子味，椰子味好濃，仲可以自己加椰絲，榛子，脆珠，啲榛子超級香同脆，好正！另外芝麻，綠茶，焙茶，士多啤梨，荔枝都超級好味，好滑，所以全個自助午餐我最欣賞就係個雪糕！
至於其他甜品就不過不失啦，綠茶蛋糕偏甜，櫻花杏仁豆腐好味杏仁味好香，千層糕就冇乜味，蕨餅都可以，士多啤梨大褔都幾好，軟軟的士多啤梨都甜，但紅豆就甜咗啲。水果都好新鮮，橙好甜好味。
