唐包點 (Closed)

今朝番工行過港鐵站時已留意到唐包點新出左熱辣辣既糖水，午飯時間立即約個同事去搶先試。一如以往，每人叫左一個有汁既飯，因為汁多送亦多，仲要係勁多肉，加埋個pack到實一實既白飯，真係份量十足。我就食魚香茄子飯，其實本來係想食蒸飯，但我最愛既豉椒排骨飯賣晒！不過塞翁失馬，焉知非福，個魚香茄子超級香，而且有好多肉碎，真係好適合撈白飯食。同事就試咖喱雞，佢話天氣凍凍地食住呢個有些少辣既咖喱汁，非常下飯，個人即時暖笠笠！d咖喱汁仲多到可以再撈多一碗飯呢！見到點心忍唔住口嗌左一份黎share，食落竟然唔乾，蝦肉亦唔會好爛，真係好好食。下次要試埋佢個招牌鮮竹卷！呢個係今日既主角！佢一共出左兩款糖水，分別係腐竹雞蛋糖水同蕃薯糖水，兩款我都好喜歡，最後揀左腐竹雞蛋，貪佢夠滋潤！入面真係有一隻蛋，而d腐竹煲到溶左入糖水裡面，好正！極度推介