早日到旺角行街, 聽朋友推介朗豪坊既大瀛喜質素唔錯, 所以就特登去試一試。我大概係五點多到達, 已經有唔少人入左場, 場內好墟冚, 睇得出好受歡迎。
叫O野食個時, 係刺身方面, 師傅唔會就住就住, 一黎就係一盤好擺得好靚O既刺身拼盤。樣樣都鮮甜﹐而我就最鐘意珍寶赤海蝦刺身, 平時係其他放題冇得試到咁大隻O既蝦, 口感仲比一般O既甜蝦正唔少!
除左刺身之外, 壽司都係值得推介O既地方, 除左平時成日都食到O既蟹棒﹑玉子壽司之外, 仲有好多特色壽司例如黑松露三文魚壽司﹑泰式鳳尾蝦壽司等等。而我就會推介京蔥煙三文魚壽司, 比平時O既三文魚壽司多一屠蔥香, 味道豐富左好多!
難得黎到, 當然乜都要試下, 燒物同炸物都唔差架。
燒物方面, 最令我印象深刻O既就係燒牛仔骨, 因為除左肉夠腍夠多汁之前, 大瀛喜用左柚子汁煮, 所以食完都唔會覺得好膩而食唔到其他野。
而炸物方面, 真心好多特色O野, 以往係其他地方只係有蕃薯, 蟹柳, 但係大瀛喜仲有埋鮑魚同瀨尿蝦天婦羅(仲未計生蠔, 魷魚圈等等), 花多眼亂, 令到我極之滿足!
講到飲品, 有好多選擇, 唔怕剩係飲汽水飲到悶, 令到個口得返O的藥水味。
食完之後, 當然唔少得O既就係甜品啦。個人特別鐘意芒果甜品, 而大瀛喜就有芒果燸米滋同楊枝甘露, 芒果又甜又大粒, 為今餐畫上完美句號。
另外, 唔可以唔讚一讚員工服務, 一般放題都係自己將O的殘骸放到食完O既刺身盤上面, 但係今次估唔到O既係侍應會自動自覺咁過黎幫你換碟, 枱面不至於屍骸遍野。
