Ba Yi Restaurant

上次嚟巴依食飯已經係2018年，5年後終於再有機會親臨光顧。今日同朋友大約晏晝一點半到餐廳，等咗大約5-10分鐘就有枱，不過要搭枱。成間餐廳坐滿人，枱與枱之間都幾迫，但環境都算整潔。好明顯係太旺場，伙記唔夠，都真係要舉一陣手先有人理。見評論話服務唔好，但今日侍應阿姨態度都算客氣，起碼我唔覺得有問題。我哋兩個女仔叫咗一個細嘅新疆手抓飯 ($60)，一份烤羊肉串，同兩杯原味酸奶。

上菜等得唔算耐，第一道先上手抓飯。個飯有淺淺嘅羊油味，雖然油，但有紅蘿蔔伴住食，唔會覺得膩。羊肉本身煮得夠淋亦唔太膻，面頭有啲孜然粉剛好，所以無蓋過本身嘅羊肉味。如果係重口味可能會嫌太淡，但我覺得唔錯。 

新疆手抓飯

$60

果然期望越大，失望越大。本身羊肉味唔夠 (膻味都太少)，expect佢孜然粉係已經灑上羊肉度，可惜係要自己點嘅，咁樣個羊肉亦無乜孜然味。多年前曾到烏魯木齊街邊食過當地正宗嘅烤羊肉，相比之下今日嘅真係好失色。

烤羊肉串

$99

食完飲番杯酸奶解油膩，剛好。酸奶質地夠濃夠杰身，唔錯。

1

原味酸奶

$30

最驚喜嘅係臨走時，隔離搭枱嘅夫婦叫咗羊肉湯，嚟到發現太大鍋，主動請我哋每人飲咗半碗。飲咗一啖馬上後悔點解要嗌羊肉串😂 個湯好清甜，有香濃嘅羊膻味，但亦唔係會令我呢個怕膻味嘅人入唔到口嗰種。我會形容係該有的羊膻味❤️

清炖羊肉湯

$50