水門雞飯 (Soy Street)

Open Now

Now Closed

旺角不嬲都多野食，今日搵到間平靚正泰國野- 水門雞飯。餐廳位於鼓油街，朗豪坊過兩步就係，非常就腳。有實體餐牌，用QRcode落單。我地兩個人叫左一飯一麵加小食同飲品。水門雞飯，雞汁加湯。冬瓜雞湯，帶好微嘅辣，飲落順口清新，唔覺有味精味。水門雞飯份量都幾多雞肉滑溜，起哂骨，咬落啖啖肉。油飯清香，附嘅醬汁惹味但唔會太鹹，配雞肉幾夾。鳳尾蝦金邊粉，選項有得揀走唔同配料，清晰又貼心。份量正常，擠埋青檸汁，食落酸酸甜甜，天氣開始熱，食下d酸甜野特別舒服。鳳尾蝦有四隻金邊粉調味啱啱好，新鮮炒起夠熱，條條分明唔會痴埋一嚿。小食- 泰式腩仔，超級脆，面頭加埋芝麻，好香脆。腩肉嫰滑，有油脂但唔會覺得太膩，切好嘅size一啖一件。附嘅醬汁酸辣，魚露味較重。飲品叫左泰式鴛鴦，凍飲都可以走冰，可惜甜度冇得揀。不過鴛鴦本身都較濃，甜度都ok，相對飲落奶茶味較濃。整體都幾好飲~朋友叫左椰青，原隻椰青大大隻，好厚肉，椰青夠熟，椰青水飲落好清甜，好啱食完重味嘅食物時飲。水門雞飯都幾多分店，整體嚟講選擇多，係平靚正嘅選擇！