宏鮨芯 (Moved) New Location

今日難得Work from Home，又好想食日本嘢，就openrice搵到呢間日本餐廳。地理位置來講都算方便，由屯門西鐵站行過嚟都唔使10分鐘。店員服務殷勤主動，環境舒適，枱與枱之間有足夠距離，客人可以放心食用。午餐有好多選擇，有熟食，亦都有刺身類。加上而家做緊八折，又跟埋麵豉湯，同埋沙律，都好抵食。每樣刺身都好吸引，所以揀咗鮨芯特級丼，有五款刺身，再有牡丹蝦同海膽。其實香港食過好多有海膽嘅海鮮丼，啲海膽都會有啲苦味，但係！今次呢個海膽好有驚喜，真心係好鮮甜，有日本嘅質素！帶子同隻牡丹蝦亦都好大隻，好鮮。五款刺身都好新鮮，完全有去咗日本嘅感覺！雖然個飯睇落去會硬身少少，但係加埋豉油食就剛剛好。個麵豉湯入邊有埋蜆肉，誠意之作！如果想食得簡單少少嘅話，朋友叫嘅呢個北海道魚生丼，都一樣好值得推薦。有齊晒北海道必食嘅魚生，帆立貝，甜蝦，三文魚，三文魚籽。甜蝦亦都比市區嘅日本料理店更鮮甜大隻，刺身份量好慷慨，睇得出餐廳好用心製作。絕對推薦大家嚟屯門支持呢間親民小店！😋我都一定會再嚟，試吓佢嘅小食。