玉桃軒酒家 (鱷魚恤中心)

Open Now

Now Closed

觀塘隱藏唔少好嘢食，今日就去咗apm隔離嘅鱷魚恤中心其中一間酒樓食中菜。 首先讚吓京烤片皮鴨，一睇就知隻鴨係新鮮燒起，因為成個鴨身係脹卜卜。師傅即場片皮，鴨皮脆卜卜，肉質嫩滑唔柴，配埋青瓜、蔥絲同麼麼皮，食落油香滿溢又有肉汁，水準拍得住酒店出品！ 我哋仲叫咗上湯焗波士頓龍蝦，+$38配伊麵，滿滿上湯汁，龍蝦啖啖肉，伊麵索晒龍蝦汁，鮮味爆燈！ 玉桃軒小炒王用料好實在，帶子鮮魷同蝦頭都算大隻且夠鮮，腰果脆口，蝦乾鹹香提味！  想食多啲菜，叫個惹味啲嘅，揀咗啫啫通菜煲，蝦醬味濃但唔會過鹹，上枱嘅時候仲有咋咋聲，熱辣辣咁食好過癮。