作為一個新界東人，真係冇番咁上下風都吹唔郁去香港西！咁岩今日有約，刮起西風，所以吹左去～～～冇錯，大家比我呃左，今次所講既「西方」，其實係指西營盤，不過被掃既的確係一間西式素cafe：LN Fortunate Coffee
係講佢個殼之前，先講下地點。
對一個從未去過西營盤既人黎講，見到個地圖都有啲啲怯，好似好多橫街窄行咁，會唔會成為一隻迷途小羔羊架？><
然後當我一睇間野個位置，即刻安心哂！地鐵站B2出口轉右直行一陣就到，真係好方便。
講到個殼就唔係好大，轉個灣就見哂，整體木系裝修設計，店內好靜，有種時尚高級感，但又係幾好打發時間既果種cafe shop。
1
店內亦有環保既生活用品、健康食品、咖啡同埋竟然有……唔同既……鐘(呢樣真係比較少有XD)賣。加上牆上既大鐘，証明佢地係想帶出時間同幸福係有關連既！
好好好！各方面都好似唔錯之後，當然又係到驗明真身既時間！
由於係下午茶時間，menu只有一張下午茶同一張主菜。雖然唔係好多，不過係極度肚餓下已經足夠令人揀到死去活來。
係痛苦之中，揀左一款下午茶+一款主菜：
(1) 嘜樂雞拼沙律+紅茶
(2) 幸福全日早餐+粟米忌廉蘑菇湯
首先飲啖湯，warm up下條脷先！
係呀，又係粟米忌廉蘑菇湯呀，又係無論中方式都好鍾意既粟米忌廉蘑菇湯呀！
味道OK ，不過反而想講下啲菇，唔係成日見到果隻罐頭菇，而係大隻而且較硬身果隻，証明唔係交行貨。
有左好感，動左情之後就黎同啲佳麗見面喇～
講真，一眼望落去，真係「的色」左啲。「三舊」真係一個有小小到喉唔到肺既數字。
不過賣相幾靚，嘜樂雞真係好嘜樂雞 ！雞肉其實係猴頭菇經油炸整成（見小圖），但一啲都唔油。沙律亦ok新鮮～
果頭話少，呢頭就黎一個重量級既佳麗！
Wow！淨係睇個樣已經…已經令我無辦法控制自己既情感！我直頭feel到佢想被我食既果份熱情！
薯條係用炸薯圈既整法，所以特別香口／炒雜菌／蕃茄豆／烘麥方包／一般都比較少係沙律出現既士多啤利。
但其實我最想介紹既係…佢個炒素滑蛋同烤德國素肉腸！
講真，本身其實唔係太鍾意啲肉系既素食，不過呢兩樣野真係幾有特色！
首先，之前食過既素蛋都係用豆腐做，但呢個係用腐皮做，估唔到觀感口感味道又ok喎，加埋啲「蛋汁」，夠哂滑。
另外就係條陽，一問之下原來係大豆做成，口感似得黎重好軟熟，個皮烤得好香同脆，真正做到皮脆內滑！
最後想講比起個殼同啲野食，更加想講啲服務。
啲staff好好笑容、好有禮貌、好健談。又問我地display既意見，阿B 有一刻扭計，又即刻入去拎個氣球出尼氹佢等等。
總之成個用餐過程都好舒服同開心。
雖然裝修，野食都好重要，不過呢啲咁warm既服務，先真正令到食客感到幸福（Fortunate）呢！
外觀：唔知點解開頭望埋去覺得似salon多啲…XD
