小店主打做外賣生意，空間唔大，但感覺幾溫馨，客人可以一邊食下野，同店主吹吓水咁。
我哋分別叫咗一個雙層牛肉芝士漢堡set 同埋一個巴馬火腿薄餅。
雙層牛肉芝士漢堡用咗Bagel做漢堡包，入邊夾左兩層厚厚嘅牛肉漢堡，同埋生菜蕃茄等配菜，配埋特製嘅燒烤汁，感覺好豐富好惹味。
尤其牛肉好Juice，食落成口肉汁。加埋Bagel有先烤過表面，所以好香脆，就算加埋牛肉都唔會變淋。
薯條夠粗身，炸得脆但唔會太油。
巴馬火腿薄餅都係即叫即整，芝士好多，而且餅底焗得好脆好薄，火腿好香，鹹鹹地好啱送酒。
一直以為將軍澳得啲連鎖商場同大型餐廳比較多，估唔到喺民居附近都隱藏咗呢間小店，整得幾有心機，下次有機會可以再試吓其他嘢食！
