滷水鵝片，好食到拍爛手掌，必食推介 ﹗試過多間潮州冷，鹿鳴居、榮發、潮合興、生昌、基圍、潮香園、等等，最高質都係依度 ﹗鵝肉滑溜溜，纖維幼緻緊緻，肉汁存在於每條肉絲之間，看得到的水潤，立立令又反晒光 ﹗半肥瘦滷水鵝，滑彈鵝皮下黏著薄薄油脂，使到香味更加突出。
刀功了得，皮肉片成黃金比例，芬芳清爽滷水汁已滲透其中，香甜味美，越答越有味道。而且半點渣都沒有，好食到不得了 ﹗沾上白醋同吃夠醒胃，配上辣油同吃夠惹味 ﹗墊底烚花生都非常有質數，吸盡滷水，半軟腍半香脆，同樣好食 ﹗完全食晒咩都無得留低。
淨豬紅，最緊要夠熱，能夠出晒煙就更好 ﹗依碗溫度滿意，湯底濃郁但完全唔辣，結實富彈性，整粒啪入口，一咬爆汁，正呀 ﹗淋上大量辣椒油就更滿足啦。我喜歡質感外層有彈性而裡面嫩滑，最憎一夾就散那一種。
潮州明爐烏頭配甜酸肉碎湯，仲有大量香菜、芹菜、芫茜，但我全部都食唔到呢 ﹗幸好個甜酸湯夠濃，可以蓋過佢地獨特既氣味。似乎烏頭受熱不太平均，半邊滾半邊無反應，唯有手動操作，不停將湯淋上烏頭面，希望快點熱又快點熟吧 ﹗耐心地等了十幾廿分鐘，終於滾起熱辣辣，夾返舊大大件既魚肉試試，滑溜 juicy，帶濃郁甜酸湯味非常開胃，魚肉散發著天然鮮魚味道，轉個身已剩低棚骨喇 ﹗好好味呢。
燉響螺瑤柱雞腳湯，每晚限量發售，侍應姐姐講最好打電話預留，好快賣晒架乍。全家都唔飲湯算數，我自己嘆。開呀 ﹗香噴噴氣味直擊臉孔，濃厚雞湯氣味濔漫著。呷一口，響螺味鮮甜可口非常突出，瑤柱海味味道同樣出眾，夠火喉熱辣辣好好飲呀 ﹗雞腳炆得膠膠滑滑又保持彈牙，正。依度一人份燉湯都要 $68 蚊，我銅鑼灣間點心賣 $58 蚊兩人份足料燉湯，抵食夾大件啦。
半煎煮烏頭，我都一把年紀喇，都係第一次食煎烏頭，煮法有點似炆煮。外皮先煎得金黃微脆，能吸引更多芡汁又更香口。淋個秘裝醬汁開始炆，埋個薄芡送上。魚皮腍身汁液豐富甜美，跟鮮嫩魚肉掉入口中，啖啖肉跟醬汁魚汁混和，美味極致。
魚湯浸肉碎魚肚青瓜，甜美健康又清新既一道菜。青瓜爽脆而味道清新，魚肚帶香濃魚味，吸埋香濃魚湯那有不好吃之理呢。肉碎魚肚青瓜要一起食先可以將質感及味道融合，發揮得淋濔盡致，豐富多層次。
潮州凍蟹，我突然好想食蟹，侍應嬸嬸即刻落足嘴頭，依隻新鮮巨蟹可遇不可求架，計平少少比您啦，多謝 $700 蚊，好好好。蟹膏充滿整個蟹蓋，特濃海水咸味，堅咸 ﹗落少少浙醋緩和一下先得。蟹肉同樣泛著海水天然咸香，不過無蟹膏那麼強烈，淡淡咸香散發著蟹肉鮮味。肉質結實微彈而滑滑，味道鮮甜清香，新鮮度表露無遺。
欖菜炒飯，炒得非常香口，雖然濕氣重左少少，幸好飯粒仍然保持嚥韌，味道不錯。
芋泥香酥鴨，因為以前係英國舅父餐館返工時，香酥鴨係炆完隻鴨再起骨，炸到透徹香脆，斬成一絲絲，用薄餅配海鮮醬、大蒜、青瓜捲住食架呢，同北京填鴨食法一樣。所以先入為主，次次都誤會跟舅父餐館出品一樣。
芋泥我完全唔喜歡食的，但芋泥就無問題喎。芋泥跟鴨肉味道直頭係天作之合，撞埋一齊產生出既化學作用使到大家味道得到進一步昇華，好味到難以形型。芋泥完全填充鴨肉每絲纖維隙縫，濕潤黏黏漿漿既質地，芋香處處。鬆化炸醬黏附在嫩滑鴨肉之上，齊件啪入口，讓芋泥、鴨肉、炸醬完全合體，非凡既味道及質感，very nice ﹗
反沙芋，熱騰騰即叫即做，小心燙嘴呀，勁熱 ﹗甜品不懂欣賞、原件芋頭亦不懂欣賞，好甜啊，還可以。媽媽節晚飯除左個青瓜肉鬆魚肚普普通通外，全部高質好食好食，似乎轉左新大廚喎，讚 ﹗
1
1
