草根食堂 (Closed)

通常去葵芳行街，想食小菜我都會同朋友一齊去呢間，雖然葵芳入面係有好多食肆，仲有間大間過呢間野嘅茶餐廳，但始終覺得呢間野好食啲。就咁睇餐牌已經見到好多唔同小菜，我同朋友通常兩個人嘅時候就會叫一個菜同一個肉。今次就叫左一個西蘭花鮑片雞球同埋咕嚕肉。成個套餐有一個湯或者一杯野飲，一個餸同一個飯。我就一定要中湯嘅，因為一飲就知冇落味精而且好足料，所以我每一次都會叫中湯。主菜當然係最重要，所以相只係得主菜。就咁睇相都見到其實兩個餸菜都似模似樣。西蘭花炒鮑片雞球，西蘭花唔太淋唔太硬身，啱啱好，只有小小西蘭花莖，而且好乾淨一條蟲都無，好好食所以略嫌份量少左啲，太快食哂了。鮑片得幾塊，唔緊要反正又唔係真鮑片，雞肉嫩滑。咕嚕肉晒細細粒，一啖一粒，漿皮薄，炸得酥脆，每一粒都黐到啲汁，汁又唔太稀唔太濃又係啱啱好。60兩蚊茶記質素我覺得算係咁，其實幾好食，雖然我見好多劣評，服務來講我又覺得OK唔太差，其實呢間野唔錯。希望呢個食評可以幫大家加返佢少少分。