Weekend唔想自己買餸煮飯咁辛苦，決定買啲滷味返屋企當晚餐。時不時經過呢間禮記潮州滷水鵝舖都見到好多人排隊買，味道應該唔差，決定試一試。呢間净係可以外賣自取，無堂食的。黎到一定要試一試招牌滷水鵝先啦，要咗半斤64蚊，分量都唔少，有好多肉，同埋無乜邊邊角角位。
滷水鵝好入味，肉香四溢，配粥配白飯都好正。仲要咗二兩鵝腸，一共30蚊。鵝腸口感爽脆，滷水香味十足！二兩一個人都唔係好夠食，因為真係食到停唔到口，下次一定會去買多啲！老闆仲推介咗佢地嘅新品——滷水牛展，都相當唔錯架！牛展筋軟肉嫩，亦都非常之入味。呢間嘅滷水汁唔會太鹹，味道香濃，幾啱我口味。同埋值得一提嘅係，佢地嘅辣椒油都好好味，配上滷水牛展一流。
下次想嘗試其他滷味~
