無骨鳳瓜沙律： 呢道沙律酸酸辣辣超級開胃。鳳瓜好大隻又好完整，食落去好脆好爽口，中意酸甜味嘅朋友一定會中意呢道菜。每一啖都充滿咗酸酸辣辣嘅味道，好正！
馬拉盞炒通菜： 泰菜必食。馬拉盞炒得油潤潤，好香，送飯一流。馬拉盞嘅鹹香味同通菜嘅嫩綠色澤，真係令人停唔到口。
香葉爆炒肉碎伴生菜包：呢道菜味道偏淡了一點，但都食到少少香葉嘅香氣。肉碎煮得剛剛好，配埋新鮮生菜包，整體嚟講都唔錯，不過如果濃味，辣翻少少就更正啦！
泰式炒牛河：牛肉好嫩，河粉好滑，味道唔錯，但同普通嘅炒牛河區別唔大。美中不足嘅係冇咩泰式風味，如果泰式感覺重啲就更好啦。
泰式炸蝦餅：蝦餅有八塊，又大又厚，食落去厚實又彈牙。外面層皮唔會好厚，仲有少少脆，裡面係鮮甜嘅蝦肉味。點埋泰式辣醬真係唔覺唔覺就清晒，真係超好味！
飲品方面，叫咗三色冰同斑斕椰子奶。三色冰真係唔錯，叫咗少甜，但味道仍然好濃郁，甜度剛剛好。啫喱好大粒，可以邊食邊飲，斑斕椰子奶都幾特別，班斕味道香濃，非常好飲。
晚市去食飯叫咗咁多嘢，埋單都係五百蚊有找，真係算抵食。而且餐廳環境都幾好，坐得舒服又冇時間限制，啱晒同朋友食飯聚會。總體嚟講，呢間餐廳真係值得一試，整體體驗係好愉快，下次有機會會再試。
1
4
