成都老碼頭火鍋 (Closed)

旺角有一間中國風嘅火鍋店，而家食唔到晚餐都可以去食個lunch，不過留意番大概1:30鐘先開所以唔好太早嚟到費事摸門釘呀！餐牌選擇多多，未揀任何野之前出去兜個圈，見到超多配料好豐富，當中最鍾意就係炸嘅黃豆同埋乾碟，又香又有口感。 出面仲有圍裙，木公筷等等，非常貼心。麻香海蜇可以直接食，好彈又爽口，作為餐前小菜一流。 宮廷藥膳湯香味十足，裏面有好多材料，就咁睇已經見到好多紅棗，杞子，淮山等等材料，非常豐富，個湯我哋一路打邊爐一路飲！ 爽脆牛黃喉呢個真心好食，唔係好多地方有得叫，而且佢依個比起出面食嘅更加爽口，非常推介。滑溜溜鴨血都幾香滑，比較厚身，一定要注意時間去食。極品PRIME手切肥牛脂肪比例均勻，雖然呢個唔係大size，但係份量都對得住價錢。手打芝士墨魚丸口感彈牙爽口，而且中間充滿芝士，比較有鹹香。竹笙吸晒啲藥膳湯味，好香濃！台灣水蓮菜口感比較爽口，平時比較少買，就值得打邊爐叫。手工韭菜餃都唔錯啊，韭菜份量夠多，好香，皮亦都唔會太厚。紫薯寬粉真係紫色，質感彈牙，視乎唔同嘅時間會有唔同質感，建議唔好放太耐會林哂。