金記冰室 (Closed)

由於Uncle今晚請我們去灣仔伊利沙伯體育館睇演唱會，所以喺開場前我們就去天樂里嘅「金記冰室」食晚飯！一入到去就見到店內嘅環境裝修好特別，好似個遊樂場咁，牆上有一大幅飛行棋嘅裝飾，而且餐牌係一塊乒乓球拍，真係好特色同相當有心思！我們叫咗中式小菜套餐：薑蔥魚腩同豉汁涼瓜燜魚腩嘅魚腩係有輕輕炸過，所以外層有啲硬身，肉質都幾鮮味彈牙，薑蔥呢個就炒得好夠鑊氣，薑蔥亦爆得好芳香，所以食落非常惹味，而豉汁呢個就燜得好入味，涼瓜亦好甘香爽脆！鮑您好味：仿鮑魚絲火腿通粉、配火腿奄列跟牛油多士嘅通粉都幾彈牙，奄列嘅表面煎得都幾香口，牛油多士就不過不失！所有嘢我們大至上都好滿意，但唯一令到我們覺得要投訴一吓嘅係熱飲嘅杯崩嘅情況都幾嚴重，心諗裝修就咁有心思咁有要求，但要嚟食用嘅餐具就「咁嘅樣」，呢點真係令到我們覺得比較失望！