祥興記上海生煎包 (Closed)

今朝刨飲食男女，推介香港100強小食，其中有推介呢間生煎包，今日過開黎魚魚魚食dinner，諗住順便試下, 當餐前小食。首先申報我唔係大食之人 ，23蚊有4件生煎包，心諗我只可以食一個。 點知，咬左一啖，不能自拔。我地已經係外賣再行到去魚魚魚等位嘅時候先食，第一啖咬落去，仲係十分燙口，跟住你會諗，“點解生煎包個皮好似紙咁薄？”再咬，嗱！係時候啜啖湯汁，唔係，情況就會好似我咁，一半嘅湯爆左出黎，十分浪費。我唯有拼命再啜埋尚有既湯汁，啖湯真係好清甜，唔太油膩好有肉味。接落黎我終於可以連皮連肉咬一口，原來個底係咁鬆脆，舊肉係有纖維，有咬口，唔係攪碎哂。不得了，如是者，不知不覺我食左2個，再加魚魚魚一大魚片魚湯米線。 好在我唔係住荃灣，唔係實變大肥婆了。