月詠

Open Now

Now Closed

最近佢喺奧海城新開，所以就試吓，睇吓佢係咪真係咁受歡迎。入到店舖後，我就嗌佢嘅招牌名菜白雞湯拉麵，本身個面會有一個糖心蛋。碗拉麵係好熱嘅，有兩片雞叉燒，唔知佢呢度啲拉麵係咪特別矜貴，份量係平時舖頭出面嘅一半，所以男士係一定唔夠飽。首先我想講吓個湯，奶白色帶點泡泡，飲落去冇乜雞味，個湯真係普普通通，我自己覺得隻味怪怪地，飲唔慣，要點佢個白松露油先好少少。糖心蛋係幾好食，真係做到流心效果。 雞叉燒食得出似係慢煮雞胸肉。 點解我講係一個奇妙嘅拉麵呢，因為食完之後半個鐘，就感覺個腸胃好像好脹，有好多胃氣，唔同食錯嘢嗰種唔乾淨嘅肚痛。係本人食咁多間拉麵之後，第一次會有呢個感覺，仲要係我只係食咗一碗麵，小食都冇食。 餐廳環境比一般拉麵鋪闊，坐得舒服嘅，同埋呢間餐廳係會收加一。