-
大館活化後成為左打卡勝地，除左充滿歐洲嘅色彩外圍，呢度嘅餐廳一樣好受歡迎🍽️，經常爆滿，最好提早做booking。今次呢間中菜館喺一樓，裝修優雅，走宮廷風格🏰，天花吊落華麗水晶燈，氣派十足。室內嘅梳化位置坐得舒服，加上燈光昏暗嘅環境情調不錯🕯️。室外設有露台bar枱,可以望反落大館內圍，啱晒喺度飲杯靚靚cocktail🍸! Menu方面主打多元化中菜，招牌菜之一嘅北京填鴨🦆同酸菜星斑片🐟要預訂，適合4-5人share，小編今次兩個人嚟食就無叫D咁大portion嘅野啦~
1️⃣ 煙燻四喜素卷 $118
薄薄一層腐皮包住冬菇絲，甘筍絲同筍絲，賣相精緻望落色彩繽紛🎨，雖然係素菜，但酸酸甜甜食落好fresh🌱，一道開胃嘅冷盤前菜。
2️⃣ 水晶皮蛋凍 $108
8小件皮蛋上面放左金BOK，賣相頓時變得高貴💎，有一層薑汁啫喱凍包住皮蛋，略嫌硬左少少，如果可以做到入口即溶就更完美🙈，值得一提係佢薑味好重，唔鐘意食薑嘅朋友就不太適合啦~
3️⃣ 殿堂叉燒 $288
小編最怕食到肥淋淋嘅肉，但係叉燒太瘦又唔好食，呢碟肥瘦比例剛剛好👍🏻，用上New Zealand Manuka honey🍯，燒得外皮焦香，好香蜜糖味，果然係殿堂級數💯。
4️⃣ 魚香蝦球 $288
單睇個名以為佢係魚香茄子D friend，原來係四川做法用辣椒炒🌶️，6隻大蝦都新鮮爽口彈牙🦐，辣辣地但又唔會油淋淋，推介👍🏻!
5️⃣石鍋葱香鵝肝和牛炒飯 $268
見到在場好多枱都有叫呢個飯就知道一定有水準，嚟到時仲冒住煙，陣陣飯香撲鼻而來🤤，米飯炒得粒粒分明，鵝肝同和牛切得較碎，但份量算多，每啖都品嚐到食材嘅香味。石鍋嘅熱力有助保温♨️，食到最後仲有飯焦添呀😋!飯上面舖滿木魚片，熱力令佢地郁嚟郁去好有動感💃🏻，呢個飯值得一試!
環境服務方面好滿意，小編今次嚟係同寶貝慶祝30個月紀念日🎉，店員主動幫手影相仲即場print反出嚟📸，準備埋手寫心意卡，幾有心思。價錢唔算中等，但以食物嘅味道同賣相，加埋環境，都算合理👌🏻。
-
環境服務：⭐⭐⭐⭐
食物質數：⭐⭐⭐⭐
打卡指數：⭐⭐⭐⭐
