襯住約左5位foodies，一於去大排檔可以嗌多啲餸。
除咗荃灣，仲有分店喺土瓜灣，西環。
1
裝修懷舊風，座位多，卡位/圓枱都有。
✨味道76分，環境75分，服務75分。
.
🔸秘製辣酒煮花螺($128)⭐️
推介⭐係荃灣旗艦店限定！
鍋底有蠟燭keep住熱，辣度大概係二小既辣，
白蘿蔔好入味，吸收哂辣酒，煮得夠稔。
花螺有長竹籤比你吉出黎食，好香口，冇沙。
.
🔸菠蘿拔絲咕嚕肉($99)⭐️
招牌菜，用梅頭肉整，啖啖肉唔會一大舊脂肪，
剛炸起，外皮撈完汁都微脆，酸酸甜甜，
汁既份量剛好黐住每舊肉，又唔會成碟都係汁。
.
🔸欖菜肉鬆四季豆($68)
太鹹，食既時候要撈好多飯。
四季豆都夠新鮮，唔會有渣。
.
🔸香煎黑松露手打蓮藕墨魚餅($96)⭐️
招牌菜，大概7塊，好香黑松露味，
咬落口感有蓮藕嘅爽，亦都有墨魚餅嘅彈牙。
.
🔸飛天通菜煲($78)
招牌菜，熱辣辣，好夠鑊氣，微微辣，
落左蝦乾整得香，食到底浸到啲汁就鹹左啲。
.
🔸楚撚豬油撈飯($20)⭐️
豬油，豉油，葱，芫荽，自己落適當份量。
砵仔飯，飯粒粒分明，豬油愈邪惡愈香口。
.
🔸番薯糖水
送飯後甜品🥣竟然有驚喜，好足料，
大大舊番薯，煲得夠稔，甜度剛好，亦都夠薑味。
