憶食尚臘味煲仔飯

Open Now

Now Closed

我同我老公係臘味忠粉，去親奶奶度食飯，都梗有臘腸同膶腸送飯。呢日我哋嘅佐敦Friend介紹我哋嚟呢間食，話個飯焦好正，又坐得舒服，結果呢間餐廳無論煲仔飯、環境同小菜都好出色，稱得上物有所值！廣式臘味煲仔飯（例） HK$148一打開個蓋，飯香同臘味香即撲鼻而來。臘味望落晶瀅通透，米飯亦都粒粒分明；食落口更加正，臘鴨咸香冇羶味（我老公平時唔食都食咗一半）、臘肉片得好薄唔會滯、而用茅台整嘅臘腸，咸得嚟有股好討喜嘅酒香甜，同啲較咸嘅臘味撈埋一齊食，再加埋蔥同芫荽，真係好爽！個飯焦更加勁，熱辣辣兼脆到極，我老公忍唔住話：「食剩半粒飯都覺得會對唔住個師傅」，結果我哋真係KO晒成窩飯，搞到夜晚食唔落飯。 辣子雞丁 HK$98一上枱嗰陣花椒香到不得了，啲雞丁仲有骨，外皮炸到好酥脆，香口惹味到極，搞到連「配菜」紅燈籠椒都好入味。 瑤柱蝦米雜菜煲 HK$85平時呢個菜我真係麻麻，一係好味精，一係好鬼淡，但呢個湯就幾好味，我哋覺得似落咗雞湯同金華火腿嚟煲，絕對唔係揸流攤，而所有菜亦都好入味，蝦米同瑤柱份量足，加埋蒜片，味道好有層次。