吉壽日本料理 (Closed)

大概半年前食過吉壽放題，覺得質素幾唔錯，所以今次慶祝朋友生日就再encore一次！食物選擇依舊好多，每張紙嗌一兩樣嘅話都已經有排食🤣 飲品亦都係多到好誇張，有大大個雪櫃好似喺便利店咁任揀之餘，仲有清酒、梅酒等等嘅選擇食放題通常第一round都係食刺身，我哋嗌咗三文魚、北寄貝、帆立貝、甜蝦等等嘅刺身，上枱嘅時候都覺得幾新鮮，食落唔會有雪藏味，唔錯！個人好鍾意食海膽，所以嗌咗幾個海膽手卷，仲有辣味三文魚手卷。海膽唔會腥，而且份量唔少，辣味三文魚味道惹味，值得一試！我哋仲嗌咗個蟹粥暖下胃，蟹粥好足料，而且粥入面嘅海鮮味幾濃，一大班人share一個份量亦唔會太多，幾好！朋友同我都好鍾意食羊架，所以每人嗌咗兩個，羊架唔會羶，而且燒得好嫩滑，趁熱食嘅時候更加一流！炸物方面有芝麻雞翼，炸蠔同埋炸榴槤。芝麻雞翼一如以往水準，新鮮得來又好味！炸榴槤餡料幾多，唔錯！全晚最驚喜係一疊牛柳粒，牛柳粒炒得非常嫩，唔會好韌，而且調味得啱啱好，好好食！我哋encore左兩round嘅牛柳粒啊！！串燒方面都幾多選擇啊！海蝦、雞軟骨上枱嘅時候都係熱辣辣，證明新鮮製造，正呀！