YakiniKuu Japanese Bbq (Moved) New Location

適逢舅父壽辰，靚靚媽咪就叫小肥揀間新野一齊慶祝。肥肥家族經常都有幫襯「山下」、「蟹道野田」、「壽司喰」，因得悉同集團仲有間日式燒肉店「YakiniKuu Japanese Bbq」家人未去過，所以就決定大好日子去試一試。隱蔽於歌賦街暗角o既燒肉店面積一啲都唔細。正門有間通風o既酒吧陽台，估計飲客可以喺嗰度邊飲邊抽煙。用餐大堂分開右邊o既二至四人卡位。及左方合併式o既二至六人散座；全部都有獨立式抽油煙機，感覺極之衛生。店子牆身掛出牛隻解剖圖及啤酒卡通，直接到題。餐桌上有齊備o既餐具及燒烤廚具。最衛生當然係每人有塊掛頸o既紙圍巾啦！餐店晚市有三款套餐可選，價位唔算過高，又可以叫黎分，個人覺得最划算。嘻嘻，生日派對由細佬負責點菜喎，唔洗諗更係五個人分四個餐啦！點選套餐隨咗有追加項目之外，最抵就係可另加$120玩兩小時生啤放題。如果唔想叫套餐的話，散叫項目及小食都有兩頁半之多。單點飲品同樣有兩頁半。由於屋企人唔係咁好啤酒，結果就即場開咗兩樽日本清酒。要讚o既不單係店內全體服務生態度都一樣和藹好客，斟酒更加係專業有效率，換酒後會自動換埋杯，見到不潔o既碗碟亦會立即換掉，當真令人食得飲得都咁放心。