點點心點心專門店 (Closed)

星期日成個新城市廣場都係人，為食豬想飲茶但又冇時間等位，於是就嚟咗呢度。呢間新派飲茶唔多創意點心，選擇亦唔多，但應有嘅都會有。蝦餃: 估唔到蝦餃又幾唔錯，大大粒，皮薄得嚟煙韌。每個入面都有大約兩三隻蝦，蝦肉仲好彈牙。流心奶皇包: 呢個豬仔造型講唔上係可愛，仲帶點豬八戒嘅神韻，都幾搞鬼嘅。奶皇包好流心，但就唔夠奶皇/蛋黃香味，整體嚟講一般。黑松露小籠包: 本來對呢個黑松露小籠包最有期望，因為為食豬係松露迷，點知對佢最失望。首先說好的黑松露得包頂嘅一點，聞落都唔多覺有味，食落更加冇味。小籠包嘅湯汁得好少，包內嘅肉好實一舊，比較似食緊個肉包。糯米雞: 餡料都幾豐富，有一截臘腸，冬菇同雞肉等等，份量唔少，係填肚之選。