入到室內成陣煙味，之後佢哋安排咗喺樓上一個頂頭木造閣仔到坐低。個餐牌都有陣味同幾污糟下；佢啲餐具拎到嚟係濕嘅，佢攞咗個酒樓倒水兜裝住盤水俾我哋洗嘢 (instead of 俾水壺我哋自己倒水洗) ，洗完都仲有成堆污漬喺度。落單嗰陣俾佢哋無視咗幾次，成十分鐘先有人過嚟寫單。不過落完單十零分鐘就上齊，仲要係幾個餸一齊上，正唔正常就見人見智啦。
我哋一行六個人嗌咗以下嘅嘢：
1. 煎蠔餅 $78
份量ok，入面嘅蠔正常份量，冇異味。不過佢層炸皮好硬，食落去好似食春卷皮咁，口感唔似平時食開嘅。
2. 啫啫雞煲 $78
雞粒每粒都有骨，食落去幾硬身，但係未至於會黐牙。至於豬潤就唔係好新鮮，縮埋一嚿嘅，好在冇異味。而且佢份量唔多，送到枱面嗰陣冇煙，全程都冇蓋。
3. 咕嚕肉 $88
佢碟咕嚕肉應該得隻手掌咁大，啲肉同啫啫雞一樣都係硬嘅，菠蘿唔似罐頭貨色。個人覺得廿幾蚊雙餸飯啲質素都好過佢。
4. 豉椒炒蜆 $88
都係得隻手掌咁大，同埋一如既往殼多過肉。佢啲蜆肉好唔新鮮，成碟嘢冇乜味。
5. 椒鹽豆腐鮮魷 $118
成兜嘢基本上都係豆腐，每人攞完一條手指尾咁長嘅鮮魷之後已經冇曬。即使得豆腐，份量都係偏少。同埋佢層炸皮好硬。
6. 滷水拼盤 $158
成碟嘢誠意麻麻。佢啲鵝肉同豬耳肥到不得了，冇乜肉食。唔知點解連咁細隻雞蛋都要切開，搞到蛋黃碎曬。其他嘢算過得去，下面有豆腐墊底。
另加6罐汽水 ($10/罐)，5碗白飯 ($10/碗)
最後賣單$718。食完佢之後應該唔會想再喺香港食潮州打冷。
