蟹仙海鮮蒸氣鍋 (仁愛街) (Closed)

秋風起，又到咗食蟹嘅季節。之前食過九龍城店已經一試難忘，老闆係海鮮供應商，全部海鮮都係新鮮由海洋直送，不含激素。而且全部都係靚野，超級鮮味。$399尊貴海鮮套餐，有哂我鍾意食嘅海鮮。上菜嘅次序係根據海鮮嘅濃淡而定，先食淡味再食濃味。咁就可以食到有層次嘅味道。貝殼類有刀貝同月亮貝，兩款都好大隻，帶有海水味，肉質彈牙。虎蝦又係好生猛，所以咬落結實。海洋生嘅青口係唔同啲，大大隻，又係好煙韌。平時食蠔一定會點醬僻咗浸腥味，但呢款韓國珍珠蠔完全唔使點任何醬汁，海洋嘅鹹味已經包住成隻蠔，真係食落先知呢種鮮味。而東星班就有半條，好有住家味道，又係好鮮。到主角龍蝦同埋肉蟹，兩款嘅膏都爆出嚟，好 creamy，肉質亦鮮甜，仲要大大隻好豐滿。蒸完已經見到龍蝦爆肌肉，所以肉質超級彈牙。膏蟹同樣出色，蟹殼嘅蟹膏真係冇得頂！食完海鮮就食蔬菜，蔬菜亦都唔需要點任何嘅醬汁，菜嘅鮮味已經係最佳嘅調味料。最後就係食粥底，有粟米、菜甫、香蔥、排骨同埋芋頭，好夠味。餐廳好nice咁每枱都送糖水，係越南椰汁雪燕燉官燕，好養顏。