台灣ET鹽水雞 (符興街) (Closed)

疫情下無得去旅行，總要周圍搵下異國美食止下癮，鍾意去台灣夜市嘅我，除咗滷味之外，鹽水雞亦係賣飛佛，之前去葵涌廣場，經常黎呢間ET鹽水雞，非常有台灣本土風味。今日黎到上水見到開咗分店，梗係買返盒返屋企同老婆一齊嘆啦。我地揀咗兩個一人餐，有雞及三款配菜，呢度嘅好處係雞胸、雞腿及雞翅可以自由配搭，咁就可以試晒唔同部位嘅雞啦。兩盒我地都揀咗雞胸加雞腿，其中揀咗貢丸、蟹柳及豬耳，雞腿肉好鮮嫩，而雞胸肉亦都唔鞋，爽口嘅豬耳令全盒雞更有口感，小辣之下越食越開胃。另一盒配菜揀咗白雲鳳爪、白蘿蔔及黑木耳，都係要咗小辣，鮮甜嘅蘿蔔吸收咗辣辣地嘅汁，更加惹味。雖然可以加十蚊有冷麵，但一盒餸嘅份量都算幾多，唔需要加都已經夠飽，而得閒買返盒黎加餸都算唔錯。