老鍋台式火鍋 (京都廣場) (Closed)

好耐無約埋班朋友打邊爐，今日就去左銅鑼灣老鍋台式半鍋聚一聚，傾下計。老鍋所提供嘅調味料都好多選擇，最與別不同嘅係佢哋有香醋同蒜泥汁。無睇錯，唔係生蒜泥，係蒜泥汁，夠哂特別😲😲。喺個鍋未滾嘅時候，最好就叫返d小食食下喇。夜市炸臭豆腐，果然係台灣風味嘅臭豆腐，點埋海鮮醬，好好食。甜不辣，係一塊大大塊嘅魚餅，好香魚味，點埋個炸雞醬，即刻明哂點解會叫甜不辣🤔🤔。時下最hit嘅咸蛋黃炸魚皮，脆卜卜、咸蛋味香。老鍋即叫即整，所以份外好食。而且份量都唔少，好抵食。三秒炸響鈴卷就無即刻食喇，響鈴都係即叫即炸，大大條，同樣脆卜卜。落鍋滾兩下就食得。👍🏻👍🏻先講下個鍋底先，我哋叫咗老饕酸菜白肉鍋。湯好好味，雖然有好多酸菜，但又唔會話好酸。鍋底仲有番茄，粟米，冬菇，豬花腩同寬粉條。要點名介紹嘅係個豬花腩，腩肉片大大塊得嚟，仲有用花鵰酒淹過，入口酒香滲透整個口腔，勁正😋😋。打邊爐點可以少咗肥牛同豚肉，依個特級美國安格斯雪花肥牛同埋極品黑毛豬梅肉我就推介一定要點喇。特級美國安格斯雪花肥牛淥耐咗都唔會唔好食。牛肉鮮嫩帶油香，一啲都唔肥膩。極品黑毛豬梅肉有命你叫，肉係梅頭肉，所以淥幾耐都咁淋，豬肉味好香濃。👍🏻👍🏻