浙江軒

Open Now

Now Closed

本人是在上海長大的香港人，從小食慣上海菜，因此比較有D要求。聽講浙江軒最近幾受歡迎，所以特登同朋友來試下，順便考慮需唔需要入會。餐廳環境尚可，無甚特別。侍應態度亦中規中矩。因為第一次來，所以點左D最穩陣既餸。之前有人講大廚係由其他會所跳槽出來，所以專登問左侍應哥哥，佢話師傅以前係夜上海同蘇浙同鄉會工作過。頭盤有招牌既搶虎尾，真係不甚了了，唔明有乜咁巴閉。油爆蝦太鹹，熏魚太甜，兩者既酒味都太搶，失左平衡。其他嘢就太一般，無冇印象。熱菜有紅燒肉、八寶鴨、清炒蝦仁，尚算可以，不過也無乜驚喜。上海人過年食的蛋餃／金元寶，味道實在一般。小籠包皮太薄或韌力唔夠，有一半夾起時就穿左（大家都係熟手，唔存在技術問題）。最失望就係冬筍塌菜，D塌菜唔新鮮，雪味太重。芝麻湯圓D餡亦有「耗」味。基本上每碟餸都有食剩，屬於平時少見。飯後所有人都一致同意：唔掂，唔會入會。以後食上海菜一定都係去返上海總會或者寧波同鄉會。