入面鋪頭細細， 座位亦不算太多，幸好仲有位所以立即入去試試佢!
要讚讚入面嘅裝修格局， 係全部都以貨櫃車位主題， 佢連廁所對門都用貨櫃門， 台裝飾及櫈椅係同一主題， 最欣賞佢嘅雜物櫃都係用上貨櫃物料，真型格
入面除咗串燒炸物外，仲有烏冬及拉麵等可以選擇種，類非常繁多
我同太太點咗呢個手打烏冬， 點咗辣味芝士做湯底， 湯底超微辣但有濃郁的芝士味， 配上熱辣辣嘅照燒雞扒， 手打烏冬夠煙靭， 成碗烏冬嘅味道都好夾
烏冬入面嘅蛋仲要係溫泉蛋， 夠吸睛之餘又好味
呢個魷魚鬚用購物籃黎裝好搞笑， 略帶鹹 夠熱又煙靭， 如果用嚟送酒真係一流
好可惜呢間餐廳原來只是試業階段，暫未有酒提供
暫無酒飲所以最終我太太點咗呢個蘋果梳打，我就點咗綠茶味可樂， 兩支都係日本出品
呢個磯燒放式煮嘅清酒蜆， 唔太大清酒味不過勝在啲蜆夠大隻鮮甜
呢個芝士年糕超正，外脆內軟，熱辣辣嘅芝士喺入邊流出嚟，不過食呢個要小心辣親
特價生蠔10蚊一隻，冇乜海水味但夠新鮮
台灣腸最緊要食又肥又多汁
最尾點嘅呢個泰式鳳爪有驚喜， 呢個鳳爪夠晒辣， 充滿紫洋蔥及紅蘿蔔絲， 鳳爪醃得啱啱好又夠爽口
總結呢間舖頭因為試業所以冇酒飲，但應該遲啲有酒飲嘅時候我會再來。 同埋佢入邊嘅抽氣系統應該唔錯，食完之後個身一啲油煙味都冇，抵讚
