成都老碼頭火鍋 (Closed)

最近好想好想食麻辣，放咗工可以好好咁麻辣一翻都真係唔錯，見到成都老碼頭呢間又大間又好似地道啲，就決定試一試，入到去啲侍應服務態度幾好。嚟到食辣就梗係要試下佢個老碼頭全紅-無渣紅油麻辣鍋啦，聽個名係咪已經口水分泌緊呢，當個湯底一拎出嚟果陣已經聞到好香好麻嘅味道邊爐料就有好吸味嘅爽口萵筍同皇帝菜，少不得嘅雪花肥牛，如果啲肥牛可以厚少就更好，值得試下個菠菜墨魚丸，彈牙口感，雖然睇落細碟，但又幾襟食，桂花蚌好爽口，都幾新鮮，淥一陣就食得，鮮魷魚又係爽牙，鴨血就好滑，正！除咗火鍋料，都有食下佢啲小食，一份紅糖滋粑，糍粑係熱嘅，有層脆皮，加埋紅糖真係好夾，由於唔係邊度都食到，亦唔係邊度都好食，我打包多一份走，另一份小食係涼拌魚皮，我第一次食就愛上了，酸甜辣嘅魚皮爽口，越來越想食。成個湯底雖然係小辣但都辣，同埋佢唔只係得個辣字，仲有花椒帶出嘅麻，味覺有層次，唔太需要再點醬料。餐廳亦貼心地預備咗圍裙，以免湯汁整污糟件衫。